Татарстан Рәисе Рөстәм Миңнеханов Мәскәүгә сәфәре барышында Югары икътисад мәктәбе студентлары белән очрашты.
«Мәскәү югары уку йортларында укучы Татарстан студентлары белән очрашу традициясен дәвам итәбез. Бүген Югары икътисад мәктәбендә булдык. Биредә 600дән артык якташыбыз белем ала. Җитәкчелектән безнең студентларның өлгерешенә югары бәя бирүен ишетү күңелле», - дип язды Миңнеханов Телеграм-каналында.
Татарстан Рәисенең матбугат хезмәте җитәкчесе Лилия Галимова ачыклык керткәнчә, хәзер югары уку йортында республикадан 646 кеше белем ала. Университет фән, югары белем бирү системасы, дәүләт хезмәте һәм предприятиеләре өчен югары квалификацияле икътисадчылар әзерли.
Татарстан Рәисе Покровкадагы университет кампусын карады, аңа төп заллар буенча экскурсия уздырдылар, бинаның тарихы турында сөйләделәр.
Фото: © ТР Рәисе матбугат хезмәте
Хәзерге вакытта югары уку йортында «Югары икътисад мәктәбе Татар яшьләре клубы - ТатарIn» эшли, аңа 230 студент керә. Биредә татар халкының мәдәнияте һәм традицияләре турында белергә була.
Студентлар Рөстәм Миңнехановка сораулар бирә алды. Аерым алганда, аларны Татарстан югары уку йортлары, илнең башка университетлары белән чагыштырганда аларның җәлеп итүчәнлеге, яшьләргә республикадагы ярдәм программалары кызыксындырды.
«Яшьләр өчен иң мөһиме — белем. Бездә яшьләргә ярдәм буенча дәүләт программалары күп. Безнең бурыч яхшы белем бирү үзәкләре булдыру, әмма Казанда гына түгел. Түбән Кама, мисал өчен, нефть химиясе, Әлмәттә Югары нефть мәктәбенең заманча кампусы. Моннан тыш, яшьләргә уңайлы һәм сыйфатлы мохит кирәк. Һәм, өченчедән, лаеклы хезмәт хакы булган эш урыннары булдырырга кирәк. Менә бу өч төп әйбер», - диде Миңнеханов.
Очрашуда туган телләрне белү темасы да күтәрелде. Татарстан Рәисе белдергәнчә, аларга сак карарга кирәк. Телне һәм гореф-гадәтләрне саклау гаиләдән башлана, дип ышана ул.
«Телне саклап калу өчен - гаилә мөһим. Өйдә ана телендә сөйләшергә кирәк. Телне генә түгел, гореф-гадәтләрне дә саклап калу мөһим. Бу әниегезнең теле - сез барыгыз да аны белергә тиеш», - диде республика җитәкчесе.
Шулай ук ул Татарстан предприятиеләре җитәкчелегенә Мәскәү югары уку йортларын карарга һәм студентлар белән очрашулар үткәрергә тәкъдим итте. Бу аларга квалификацияле белгечләр эзләүдә ярдәм итәчәк.
