Һава температурасының кискен үзгәрүе сәбәпле, күп фатирлы йортларның һәм башка биек биналарның түбәсеннән кар төшү куркынычы арта. Бу хакта бүген Татарстан Хөкүмәте Йортында узган традицион киңәшмәдә республика Рәисе Рөстәм Миңнеханов искәртте. Татарстан җитәкчесенең матбугат хезмәте шул хакта хәбәр итә.
Татарстан Рәисе үз чыгышында, 20 декабрьдә Түбән Камада 8 яшьлек малайның өстенә бозлы кар төшүе турында искә төшерде. Баланың баш сөяге һәм баш мие җәрәхәтләнгән, ул хастаханәгә озатылган. Бу очрак буенча тикшерү нәтиҗәләре турында Россия Тикшерү комитеты рәисе Александр Бастрыкинга хәбәр итәргә кирәк.
«Бу мәсьәләләргә аеруча игътибар итүегезне сорыйм. Яңа бәхетсезлек очракларын булдырмас өчен йорт түбәсеннән һәм кәрнизеннән, балконнардан кар чистартуда җаваплы милекчеләргә һәм идарәче компанияләргә карата таләпләрне көчәйтергә кирәк», - дип йөкләде Рөстәм Миңнеханов.
Моннан тыш, республика җитәкчесе сүзләренчә, «шулай ук киләсе ялларда йорт яны территорияләренең һәм тротуарларның торышын игътибарсыз калдырырга ярамый».
«Муниципаль берәмлекләр башлыкларына, торак-коммуналь хуҗалык оешмалары җитәкчеләренә, Татарстан Транспорт һәм юл хуҗалыгы министрлыгына һава торышының үзгәрүенә үз вакытында игътибар бирергә кирәк. Юллар, ишегаллары, җәмәгать урыннары һәм торак фонды сыйфатына барыннан да элек гражданнарның иминлеге бәйле», - диде ул.
«Татар-информ» хәбәр иткәнчә, циклоннар йогынтысында ял көннәренә кадәр Татарстанда аномаль җылы һава торышы сакланачак. Бүген республикада +2..-3 градус көтелә.
«<…> Явым-төшемнәр, һава температурасының 0дән югары булуы биналарның түбәләреннән һәм башка авыш өслекләрдән кар төшүгә китерергә мөмкин», - дип кисәтте татарстанлыларны Гидрометеорология һәм әйләнә-тирә мохитне күзәтү үзәге һәм сак булырга өндәде.