Дөньяда СОVID-19 авыручылар саны алдагы ай белән чагыштырганда 52 процентка арткан. Бу хакта «Российская газета» Бөтендөнья сәламәтлек саклау оешмасына сылтама белән хәбәр итте.
Хисапта әйтелгәнчә, 20 ноябрьдән 17 декабрьгә кадәр вакытта 850 мең кеше коронавирус йоктырган. Чирдән соң сәламәтлекләре какшау сәбәпле, 3 мең кеше (алдагы ай белән чагыштырганда сигез процентка кимрәк) үлгән.
Ковидтан хастаханәдә дәваланучылар 23 процентка, ягъни 118 меңнән арткан. Аларның 1,5 меңе (51 процентка арткан) интенсив терапия бүлегенә эләккән.
Бөтендөнья сәламәтлек саклау оешмасында белдерүләренчә, бу хисап дөньядагы реаль картинаны чагылдырмый, чөнки коронавирус йоктыру турындагы мәгълүматны бары тик 105 ил генә тапшырган, үлем очраклары турында 50 ил мәгълүмат биргән.
