Актаныш районы ЗАГС бүлегендә бүген тантаналы чара булып узды. Киров авылында яшәүче Ибраһимовларга өченче балаларының туу турындагы таныклыгын тапшырдылар. Гаиләдә өченче бала Актанышта быел 150нче булып туган. Бу хакта «Актаныш» сайтында хәбәр ителә.
Әти кеше өчен нәсел дәвамчысы улы туу аеруча сөенечле. Салават Ибраһимов та үзенең шатлыклы хисләрен яшерми. Үзенең исеменә тәңгәлләштереп нәни баһадирга Азамат исемен кушканнар. Бүген бәхетле әти хатыны Азалияне Актаныш бала тудыру йортыннан чыгару белән район ЗАГС бүлегенә килделәр. Гаиләнең бәхетле мизгелләрен якыннары, ике кызлары да уртаклашты.
Ибраһимовлар баланың туу турындагы таныклыгын Дәүләт хезмәтләре порталының «Суперсервис» хезмәте аша ала. Азалия шәхси кабинетыннан район ЗАГС бүлегенә гаризасын тутырып җибәрә. Документларны болай рәсмиләштерү бик тиз башкарыла.
