Россия Президенты Владимир Путин стратегик үсеш һәм илкүләм проектлар советы утырышында бюджет хезмәткәрләренең хезмәт хакы 2012 елның май указларында каралган дәрәҗәгә ирешсен өчен барысын да эшләргә кушты.
«Бу күрсәткечләргә чыгу өчен барысын да эшләргә кирәк», — дип ассызыклады дәүләт башлыгы һәм Россия вице-премьеры Татьяна Голиковадан бу мәсьәләгә игътибар белән каравын сорады. Бу хакта ТАСС яза.
Үз чиратында Голикова планлаштырылган күрсәткечләргә ирешүдә хөкүмәтнең чаралар күрүен, әмма «планлаштыруда кечкенә проблема бар» дип ышандырды. Ул хезмәт хакларының алданрак үсүен сәбәп итеп күрсәтте: 2023 елның беренче тугыз аенда алар номиналь рәвештә 13,7 процентка арткан, ә планлаштырылган үсеш 8,7 процент дәрәҗәсендә булган.
Моннан тыш, вице-премьер бюджет хезмәткәрләренең хезмәт хакы дәрәҗәсенең төбәк буенча максатчан күрсәткечләренә ирешү мониторингы мөһимлегенә игътибар итте.
Элегрәк «Татар-информ» хәбәр иткәнчә, Путин яңартылган илкүләм проектларны 2024 елда эшләтеп җибәрү турында игълан итте һәм күп балалы гаилә статусын билгеләү кирәклеге турында белдерде. Стратегик үсеш һәм илкүләм проектлар советы утырышында Татарстан Рәисе Рөстәм Миңнеханов катнашты.
Россия Президентының 2012 елның май указларына ярашлы рәвештә, мәктәп укытучылары, балалар бакчалары педагоглары, колледж укытучылары һәм мәдәният учреждениеләре хезмәткәрләренең хезмәт хакы төбәк буенча уртача хезмәт хакының 100 процентына кадәр җитәргә тиеш. Ә табибларның, югары уку йортлары укытучылары һәм фәнни хезмәткәрләрнең хезмәт хакы төбәк буенча уртача хезмәт хакының 200 проценты кадәр булырга тиеш. Күрсәткеч күчеп бара, ул шушы дәрәҗәдә сакланырга тиеш.
2023 елның язында «Ведомости» газетасы, Дәүләт статистикасы федераль хезмәте мәгълүматларына нигезләнеп, 2022 елда май указлары таләпләре илнең 12 төбәгендә генә үтәлгән, дип исәпләп чыгарган.
