«Китәм дигәндә, сайлап ала алырлык активистлар булса, бик зур афәрин. Сайлап алыр кешең булмый икән, бу – оят», – диде Милли шура рәисе.
Бөтендөнья татар конгрессының Милли шура рәисе Васил Шәйхразыев һәр җитәкче үзен алыштыра алырлык яшьләр әзерләп кую мөһим булуын әйтте.
Бүген Бөтендөнья татар конгрессында Васил Шәйхразыев журналистлар белән очрашты. Каләм ияләре аннан милли хәрәкәткә яшьләр килүе турында кызыксынды.
«Милли хәрәкәткә яшьләрне җәлеп итү бурычы тора. Кайбер төбәкләрдә милли автономия җитәкчеләре олыгаеп бара. Без аларга үз тирәләренә яшьләрне җәлеп итү, үз урыннарына лаеклы яшьләрне әзерләү бурычы куябыз. Бу мәсьәлә үземә дә кагыла. Китәм дигәндә, сайлап ала алырлык активистлар булса, бик зур афәрин. Сайлап алыр кешең булмый икән, бу – оят. Минем урынга сайлап алынырлык 4-5 кеше бар», – диде Васил Шәйхразыев.
Шушы көннәрдә Бөтендөнья татар яшьләре форумының җитәкчесе алышынды. «Оешманың үз эченнән 23-24 яшьлек кешене сайлап куя алу да милли хәрәкәткә яшьләр килүен күрсәтә», – дип аңлатты Васил Шәйхразыев милли хәрәкәттә яшьләрнең булуын.
Милли шура рәисе милли хәрәкәттә катнашучыларның соңгы арада дәрәҗәсе артуын белдерде. «Милли автономияләрдәге җитәкчеләрнең дәрәҗәсе күтәрелде. Бу аларның халык алдында чыгыш ясауларыннан да, җирле хакимият белән эшли алуларыннан да күренә. Алар автономия эшеннән үсеп, өлкә дәрәҗәсендәге сәясәтчеләргә әйләнеп баралар», – диде Васил Шәйхразыев.
