Татарстанда балалар омбудсмены Ирина Волынец күп балалы гаиләләрне коммуналь хезмәтләр өчен түләүдән азат итәргә тәкъдим итте. Аның сүзләренчә, мондый гражданнар өчен һәр кешегә «квадратларда» социаль норматив билгеләргә кирәк. Бу хакта «RT» яза.
Инициатор ассызыклаганча, күп балалы гаиләләр хезмәтләрдән куллануны билгеләнгән нормативтан арттырса гына, торак-коммуналь хуҗалык өчен түләячәк. Спикер мөрәҗәгатен Дәүләт Думасының гаилә, хатын-кызлар һәм балалар мәсьәләләре комитеты рәисенең беренче урынбасары Татьяна Буцкаяга җибәрделәр.
Волынец сөйләвенчә, Россиядә «Күп балалы гаиләләргә социаль ярдәм чаралары турында» карар бар. Анда коммуналь хезмәтләр өчен түләү чыгымнарын компенсацияләү турында язылган, ул - мондый гаиләләр өчен дәүләт тарафыннан бирелә торган ташламаларның төп төрләренең берсе. Шулай ук бу гаиләләргә коммуналь хезмәтләргә ташламалар бөтен җирдә дә диярлек бар, әмма мондый дәүләт ярдәмен алу күләме һәм шартлары аерыла, дип өстәде ул.
Нәкъ менә шуңа күрә Волынец мондый гаиләләрне коммуналь хезмәтләр өчен түләүдән азат итү мөмкинлеге теркәлгән, гаиләнең һәр әгъзасына квадрат метрларда норматив билгеләнә торган закон проектын эшләргә кирәк дип саный. Әгәр гаилә әлеге күрсәткечтән арттырса, артып киткән өлешен түләячәк.
