Зәйнең Туган як тарихын өйрәнү музеенда озак еллар иңне-иңгә куеп яшәүче парлар өчен зур бәйрәм чарасы узды. Бу хакта «Зәй яңалыклары» хәбәр итә.
Тантанага Иске Зәйдә яшәүче 55 ел бергә яшәүче Маргарита һәм Михаил Ивановлар, алтын туйларын 28 декабрьдә билгеләп үтәчәк Валентина һәм Юрий Колчериннар, 45 ел бергә гомер итүче Наталья һәм Виктор Самарцевлар, Зинаида һәм Василий Мишаровлар, 35 ел кулны-кулга тотынып бер сукмактан атлаучы Роза һәм Фәрит Габдуллиннар чакырылган иде.
«Шатлыкларын да, авырлыкларны да бергә кичереп, пар канат булып шушы көнгә кадәр килеп җиткәнсез икән — моңа сокланмый мөмкин түгел. Яшьләргә дә сез үрнәк. Киләчәктә дә исәнлектә, бер-берегезнең, балаларыгызның кадер-хөрмәтен тоеп яшәргә насыйп булсын сезгә, — диде ЗАГС бүлеге җитәкчесе Гөлфия Вәлишина.
Һәр гаилә үзенең тарихы турында кызыклы итеп сөйләде. Ахырдан парлылар, яшьлекләрен искә төшереп, вальс биеде.