Г.Камал исемендәге Татар дәүләт академия театрының яңа бинасы 2026 елда файдалануга тапшырылырга тиеш. Проектның архитекторы Олег Шапиро «Татар-информ» агентлыгы хәбәрчесенә шулай дип белдерде.
«Бездә билгеле бер срок бар. 2026 елда театр бинасын төзеп бетерәбез икән, бу вакытка барысын да эшләячәкбез, бөтенесе дә үз урынында булачак», - диде ул.
Камал театрының маркетинг һәм пиар буенча генераль директор урынбасары Илшат Латыйпов та шул ук датаны – 2026 ел – атады.
«Театр 1911 елда оешты, берничә тапкыр күченде. Бу безнең өчен өченче күченү булачак, дүрт бина. Аллаһ боерса, 2026 елда күчәбез», - диде Латыйпов «Казаныш» архитектура-төзелеш форумында паблик-ток вакытында.
Яңа бина Кабан күле буенда, Һади Такташ һәм Нурсолтан Назарбаев урамнары чатында төзелә.