Татарстан һәм Үзбәкстан хезмәттәшлеге яңа үсеш этабы кичерә. Бу хакта Татарстан Рәисе Рөстәм Миңнеханов дустанә республиканың региональ сәүдә-сәнәгать палаталары җитәкчеләре белән очрашуда белдерде. Бу хакта Татарстан Рәисе матбугат хезмәте хәбәр итә.
«Сезнең Татарстанга сәфәрегез — Россия белән Үзбәкстан арасындагы дуслык мөнәсәбәтләре кысаларында Татарстан–Үзбәкстан хезмәттәшлеген үстерүгә юнәлдерелгән яңа элемтәләр урнаштыру өчен менә дигән мөмкинлек», — диде ул.
Фото: © ТР Рәисе матбугат хезмәте
Ул билгеләп үткәнчә, Үзбәкстан һәм аның төбәкләре белән хезмәттәшлекне киңәйтү мөмкинлеген Татарстан югары бәяли.
«Тарихи яктан һәрвакыт шулай булды. Әмма бүген безнең мөнәсәбәтләр үсешендә аерым чор. Без дәүләт башлыкларыбыз Владимир Путинга һәм Шәүкәт Мирзиеевка төбәк дәрәҗәсендә хезмәттәшлеккә булышлык күрсәткәннәре өчен рәхмәтле», – диде Миңнеханов.
Фото: © ТР Рәисе матбугат хезмәте
Ул Шәүкәт Мирзиеевның Татарстанга беренче тапкыр күптән түгел килүен искәртте. Аның сәфәре бик уңышлы үтте, ул алга таба уртак проектларга ярдәм итәчәк, дип өстәде.
Очрашуда катнашучылар берничә тармак буенча хезмәттәшлекнең перспектив юнәлешләре турында фикер алышты. Алданрак Үзбәкстанның сәүдә-сәнәгать палаталары җитәкчеләре Татарстанга сәфәрләре барышында «Алабуга» махсус икътисади зонасы, «ТАНЕКО» һәм «Химград» да булдылар.
Фото: © ТР Рәисе матбугат хезмәте