Мәскәү Татар мәдәнияте үзәгендә Түбән Новгород өлкәсендә туып-үскән якташлар катнашында «Без Нижгар якларыннан» концерты узды. Анда чыгышлары шушы төбәк белән бәйле булган татар мәдәни үзәге артистлары һәм кунаклар — Түбән Новгородның татар авыллары кешеләре, татарлар тупланып яшәгән Кызыл Октябрь районы мәдәни оешмалары хезмәткәрләре катнашты. Бу хакта Мәскәү татарлары автономиясе матбугат хезмәте яза.
Программада Заһирә Габделхаликова, Светлана Хәйруллина, Рәмис Хәйруллин, Рамил Сафин, Наилә Җамалетдинова, Зилә Галимова катнашты. Алар барысы бергә Түбән Новгород өлкәсенең Уразавылдан «Бәйрәм» эстрада фольк-шоу ансамбле буларак чыгыш ясый. Программада шулай ук популяр җырчы Илдус Харрасов, Татар мәдәнияте үзәгеннән баянчы Рушан Локманов, «Тальян» җыр театры солисты Флора Шәмсетдинова, Рафик Вәлитов, Ринат Каюмов, Венер Хәйруллин (»Мәскәү егетләре» ансамбле) катнашты.
Махсус хәрби операциядә катнашучы хәрби якташларга карата теләктәшлек сүзләре һәм аларга багышланган җыр белән запастагы полковник Таһир Мөхәммәтов чыгыш ясады. Залдагы тамашачылар, нигездә, Түбән Новгородтан булган якташлар, махсус операция хәрбиләрен озак алкышларга күмде һәм һәлак булганнарны искә алды. Концертны Галия Әюпова алып барды, диелә хәбәрдә.