82 яшендә «Лениногорск хәбәрләре» газетасының элеккеге мөхәррире, Татарстанның атказанган мәдәният хезмәткәре Николай Игнатьев вафат булган. Бу хакта «Лениногорск хәбәрләре» газетасы яза.
«Николай Михайлович турында үткән заманда сөйләү авыр... Игелекле, намуслы, риясыз һәм һәркем хөрмәт иткән кеше вафат булды. <...> Хезмәттәшебез, остазыбыз һәм дустыбыз турында якты истәлек мәңгегә безнең йөрәкләрдә калыр», — диелә хәбәрдә.
Мәрхүмне соңгы юлга озату 14 ноябрь көнне 10.30 сәгатьтә Лениногорск шәһәрендә, хастаханә шәһәрчеге территориясендә узачак, дип билгеләп үтелә хәбәрдә.
Николай Игнатьев Мәскәү өлкәсенең Коломна шәһәрендә 1941 елның 29 апрелендә туган. Бөек Ватан сугышы башлангач, аның әнисе Лениногорскига килә.
Ул хезмәт эшчәнлеген ул 1963 елда Лениногорск телевидение студиясендә башлый. 1967-1969 елларда «Ильич васыятьләре» («Заветы Ильича») газетасы редакциясендә эшли (хәзерге вакытта «Лениногорск хәбәрләре» — «Лениногорские вести»). 1977-1981 елларда партиянең шәһәр комитеты инструкторы була.
Аннары «Лениногорснефть» нефть-газ чыгару идарәсенең «Нефть өчен» («За нефть») газетасын җитәкли. 1983 елда аны «Ильич васыятьләре» район газетасы редакторы итеп билгелиләр, ул аны 1998 елга кадәр уңышлы җитәкли. 2001 елга кадәр биредә редактор урынбасары булып эшли.
Дүрт чакырылыш шәһәр Советы депутаты (1983-1999 еллар) була, СССР Журналистлар берлегенең Лениногорск бүлеген җитәкли.
