Патриарх Кирилл могҗизалы Казан Мәрьям Ана иконасының төп нөсхәсе табылу турында игълан итте. XVI гасырга караган икона моңа кадәр югалган дип санала иде. Бу турыда ТАСС хәбәр итте.
Патриарх Кремльнең Успение чиркәвендә литургия башланыр алдыннан шул хакта белдерде. Биредә дин тотучыларга иконаның төп нөсхәсе дә тәкъдим ителде.
«Экспертиза аның могҗизалы образ тудырылган чорга каравы турында нәтиҗә чыгарды», - диде патриарх һәм аның XVII гасыр башында кенәз Дмитрий Пожарский белән Кузьма Минин гыйбадәт кылган икона булуын искәртте, дип яза «Татар-информ».
Казан Мәрьям Ана иконасы православие динен тотучылар өчен иң изге әйберләрнең берсе санала, ул Россия дәүләте һәм Рус православие чиркәве тарихының мөһим чорлары белән бәйле. Икона турында беренче тапкыр Иван Грозный патшалык иткән заманда искә алганнар. Ул озак еллар югалган дип саналган.
Патриарх искәрткәнчә, соңгы елларда икона Переделкинода патриарх резиденциясендә башка иконалар арасында складта сакланган, диелә хәбәрдә.
