28 октябрьдә И.Н.Ульянов исемендәге Ульяновск дәүләт педагогика университеты базасында «Халыклар күп – дөнья бер» халыкара телләр фестивале булды. Бу хакта «ЯшьTeam» Ульяновск өлкәсе татар яшьләре оешмасының «ВКонтакте» социаль челтәрендәге рәсми төркемендә хәбәр ителә.
Фестивальдә «ЯшьТеам» командасы әгъзалары Гөлназ Бәхтиярова һәм Эльвина Усманова «Минем яраткан татар телем» презентациясе белән татар телен тәкъдим итте.
Тамашачылар татар халыкның гореф-гадәтләре, милли ризыклары белән танышты, бу телдә беренче сүзләрен әйтте, шулай ук яулык бәйләү буенча мастер-класс оештырылды. Соңыннан барысы да чәкчәк белән сыйланды.
