Санкт-Петербург шәһәрендәге Россия Милли китапханәсенең яңа бинасында Хөсәен Фәезхановка багышланган күргәзмәне ачу тантанасы булды. Бу турыда «ВКонтакте» челтәрендә «Мәскәү Диния-Нәзарәте» сәхифәсендә хәбәр ителә.
«Хөсәен Фәезханов (1823-1866) – кыска гына гомере эчендә үзен Көнчыгышны өйрәнүче (филолог һәм тарихчы), теолог һәм алдынгы мәгърифәтче буларак күрсәтә алган милләттәшебез», диелә хәбәрдә.
Күргәзмәдә үзәк урын «Материалы по истории Крымского ханства» хезмәтенә бирелгән, аны төзегән өчен Х.Фәезханов Император Рус Археология җәмгыяте әгъзасы итеп сайланган – әлеге дәрәҗәгә ул татар-мөселманнары арасыннан беренчеләрдән лаек булган.
Күргәзмәнең зур өлешен Фәезхановның биографиясе һәм фәнни мирасы турындагы фәнни мәкаләләр тәшкил итә, алар арасында Ш.Мәрҗани, Р.Фәхретдин, Ә. Вәлиди һәм М.Усмановның хезмәтләре бар. Бер бүлеге Габделгалләм Фәезханов эшләре белән таныштыра. Ул Х.Фәезханның туганы, педагогик, әдәби һәм публицистик эшчәнлек белән шөгыльләнгән.
Х.Фәезханов хезмәтләренең заманча басмалары «Мәдинә» нәшрият йорты тарафыннан, нәшриятның баш мөхәррире, теология докторы, профессор Дамир Мөхетдинов җитәкчелегендә әзерләнгән. Күргәзмәне нәшрият йорты коллекциясеннән Фәезхановның фикердәшләре һәм замандашлары портретлары тулыландыра.
Тантаналы ачылышта РФ мөселманнары Диния нәзарәте рәисе урынбасары, «Мәдинә» нәшрият йорты җитәкчесе Илдар Нуриманов, РФА Көнчыгыш кулъязмалары институты директоры Ирина Попова, Ислам мәдәнияте, фәне һәм мәгарифенә ярдәм фонды киңәшчесе Алексей Потров, күргәзмәнең кураторы, Татарстанның атказанган мәдәният хезмәткәре Әлфия Рәхмәтуллина һәм башкалар катнашты.
Күргәзмә Россиядәге «Укытучы һәм остаз елы»на багышлана һәм РФ мөселманнары Диния нәзарәте, Мәскәү ислам институты, «Мәдинә» нәшрият йорты белән берлектә Хөсәен Фәезхановның 200 еллыгына багышланган чаралар программасы нигезендә Ислам мәдәнияте, фәне һәм мәгарифенә ярдәм фонды булышлыгында оештырыла.
Күргәзмә ноябрь ае буена дәвам итә, диелә хәбәрдә.