Бүген Казанның Мәскәү районы суды Татарстан Дәүләт Советының элеккеге депутаты Рөстәм Хәсәновка хөкем карары чыгарды. Аны аеруча зур күләмдә наркотиклар саклауда гаеплиләр. Бу турыда «Татар-информ» хәбәрчесе Елена Фенина яза.
Эш материалларыннан күренгәнчә, 17 сентябрьдә депутат интернет аша 4000 сумга 1,88 грамм мефедрон сатып алган. Сатучы аңа товарны яшергән урынны хәбәр иткән. Хәсәнов күрсәтелгән координаталар буенча Беломорск урамындагы янгын сүндерү частена китә һәм наркотикны ала. Кире кайтканда ул полиция нарядын очрата һәм тыелган матдә төргәкләреннән котылырга ашыга, әмма тәртип сакчылары моны күреп ала.
Депутатны сак асытна алмадылар, ул читкә китмәү турында имза куйган. Бүген судта аның адвокаты хәбәр иткәнчә, Хәсәнов үз теләге белән һәм вакытыннан алда вәкаләтләреннән баш тарта, шулай ук хәйрия фондына иганә бирә.
Адвокат аның үзен гаепләгәнче үк гаебен тануын әйтте. Элеккеге депутат гаебен таныган һәм аның эшен аерым, тизләтелгән тәртиптә карарга сораган.
Фото: © «Татар-информ», Елена Фенина
Фикер алышканнан соң дәүләт гаепләве аңа бер ел һәм өч ай шартлы рәвештә ирегеннән мәхрүм ителү рәвешендә җәза билгеләргә сораган. Адвокат исә гомумән дә җинаять эшен туктатырга һәм элеккеге депутатның үкенүенә сылтама ясап, штраф белән чикләнүне сорады.
Соңгы сүзендә Хәсәнов, хөкем ителүче статусы булмаган килеш, җәмгыятькә файдалырак булачагын белдерде. «Минем тарафтан беренче тапкыр шундый зур җинаять кылынды. Бу ахмаклык гамәле», - дип таныды ул.
Судья киңәшмә бүлмәсенә чыгып китте, шуннан соң кире керде һәм хөкем карарын игълан итте. Рөстәм Хәсәновка бер елга ирегеннән шартлы рәвештә мәхрүм итү җәзасы бирелде.