Аксубайда Хәсән Туфанга багышланган укулары була

Аксубай туган якны өйрәнү музее балаларны һәм өлкәннәрне «Туфан укулары» IIIV зональ бәйгедә катнашырга чакыра. Бу хакта «Аксубай» газетасы яза.

Катнашучылар өчен өч яшь категориясе билгеләнгән.

Бәйге түбәндәге номинацияләр буенча уздырыла:

• Хәсән Туфанның шигырьләрен сәнгатьле уку;
• сәнгать иҗаты: әсәрләргә иллюстрацияләр. Иллюстрацияләрне паспартка рәсмиләштерергә. Эшләр күләме А3 форматы (иҗади эшләр кире кайтарылмый);
• декоратив-гамәли сәнгать: агачтан кисеп ясалган, каен тузыннан эшләнмәләр; агачка бизәк төшерү; тирене нәфис эшкәртү; киез эшләнмәләр; шагыйрь әсәрләре буенча нәфис чигү (иҗади эшләр кире кайтарылмый);
• Хәсән Туфан иҗаты буенча авторлык әсәрләре;
• Хәсән Туфан шигырьләренә иҗат ителгән җырларны башкару.

Беренче тур – читтән торып катнашу. Гариза һәм шигырь уку төшерелгән видеоязма hasantufan2021@mail.ru электрон адресына җибәрергә кирәк. Гаризалар 2023 елның 15 ноябренә кадәр кабул ителә.

Иҗади эшләрне шулай ук 2023 елның 15 ноябренә кадәр Аксубай туган якны өйрәнү музеена түбәндәге адрес буенча тәкъдим итәргә: 423060, ТР, Аксубай районы, Аксубай шәһәр тибындагы бистәсе, Романов урамы, 8 йорт.

Икенче тур: беренче турны узган катнашучылар «Туфан укулары» бәйгесендә катнашу өчен шәһәр тибындагы Аксубай бистәсенә килә. (Үзең белән икенче аяк киеме, чыгыш ясау өчен костюм булырга тиеш һәм әгәр кирәк булса музыкаль озату).

Бәйге турында тулырак 8 9872869072 телефоны буенча шалтыратып белергә мөмкин, диелә хәбәрдә.