Инвалид балаларны комплекслы тернәкләндерү һәм абилитацияләүгә электрон сертификатлар бирергә кирәк. Татарстанның балалар омбудсмены Ирина Волынец шундый закон проектын әзерләү идеясе белән чыкты, дип хәбәр итә RT.
Волынец сүзләренчә, электрон сертификат механизмнарыннан файдалану гражданнарның дәүләттән социаль ярдәм алу процедурасын сизелерлек гадиләштерә һәм финанс ягыннан ачыклыгын арттыра.
Әлеге шартларны исәпкә алып, Татарстанда бала хокуклары буенча вәкаләтле вәкил инвалид балаларны комплекслы тернәкләндерү һәм абилитацияләү хезмәтләренә электрон сертификатлар куллану өлкәсен киңәйтергә тәкъдим итте.
Мондый сертификат ярдәмендә махсуслаштырылган учреждениеләрдә тернәкләндерү чаралары, пациентлар һәм аларны озатып йөрүчеләрнең туклану һәм яшәү чыгымнары өчен түләргә мөмкин булачак. Биредә тернәкләндерү процедурасы уза торган урынга кадәр транспортта бару чыгымнарын компенсацияләү хакында да сүз бара, дип искәртте ул.
Мөрәҗәгать Дәүләт Думасының Гаилә, хатын-кызлар һәм балалар комитеты рәисенең беренче урынбасары Татьяна Буцкая һәм Думаның Сәламәтлек саклау комитеты рәисе Бадма Башанкаевка юлланган.
Элегрәк «Татар-информ» агентлыгы Ирина Волынецның яшүсмерләр өчен зыянлы эшләрнең куркыныч нәтиҗәләре турында кисәткән иде.
