Екатеринбургта узган «СВОЙ» ачык театр фестивале нәтиҗәләре билгеле булды. Кариев театры да – җиңүчеләр исемлегендә. Бу хакта ТР Мәдәният министрлыгы матбугат хезмәте хәбәр итә.
«Рөстәм маҗаралары» спектакле (режиссеры Тимур Кулов, инсценировка авторы Айдар Әхмәдиев) жюриның югары бәяләмәсен алды, анда уйнаган актерлар – Татарстанның атказанган артисткасы Альбина Гайзуллина һәм Булат Гатауллин «Виртуозларча актерлык осталыгы» номинациясендә иң яхшылар булып танылды.
Спектакльне карарга Урал татарлары да килгән иде. Татарстан Республикасының Свердловск өлкәсендәге даими вәкиле Хәйдәр Гыйльфанов Альбина белән Булатка рәхмәт хатлары тапшырды.
Гадел Кутуй әсәре һәм аның улы Рөстәм Кутуй истәлекләре нигезендә куелган «Рөстәм маҗаралары» спектакленең премьерасы узган елның декабрендә булды. Бу елның сентябрендә генә дә әлеге спектакль ике мәртәбәле фестивальдә катнашырга өлгерде: Казанда узган АРТМИГРАЦИЯ яшь режиссура фестивалендә һәм Екатеринбургта узган «СВОЙ» ачык театр фестивалендә.
