1 октябрьдә билгеләп үтелә торган Өлкәннәр көне һәм 5 октябрьгә туры килә торган Бөтендөнья укытучылар көне уңаеннан чараларны югары дәрәҗәдә үткәрергә кирәк. Бу хакта Татарстан Рәисе Рөстәм Миңнеханов ТР Хөкүмәте Йортында узган традицион киңәшмәдә белдерде. Республика җитәкчесенең матбугат хезмәте шул хакта хәбәр итә.
Татарстан Рәисе искәрткәнчә, өлкән буын вәкилләре үсеш өчен күп елларга алга потенциал булдырды. Аның фикеренчә, хәзер алар яшьләрне тәрбияләүгә зур өлеш кертә.
Шуңа бәйле рәвештә Рөстәм Миңнеханов өлкәннәр турында кайгыртуны өстенлекле бурычларның берсе дип атады. «Бу көн безгә өлкән буынга, безнең укытучыларга һәм остазларга рәхмәт сүзләрен тагын бер кат җиткерергә мөмкинлек бирә», - диде ул.
Республика җитәкчесе 1 октябрьдән 10 октябрьгә кадәр дәвам итәчәк Өлкәннәр ункөнлеге кысаларында ветераннарны хезмәт коллективларында хөрмәтләүне оештырырга, алар өчен мәдәни-массакүләм һәм физкультура-савыктыру чаралары, концертлар, мастер-класслар, эстафеталар һәм экскурсияләр уздырырга кушты. Аның сүзләренчә, «республика активы» вәкилләрен вакыйгаларда катнашуны тәэмин итәргә кирәк булачак.
«Оешмалары бетерелгән ветераннар турында да онытмагыз. Аларның яшәү урыны буенча безнең бөтен мәгълүмат булырга тиеш», - дип өстәде Миңнеханов.
Якынлашып килүче Укытучылар көне уңаеннан Татарстан Рәисе билгеләп үткәнчә, Россия Президенты Владимир Путин карары белән 2023 ел Укытучылар һәм остазлар елы дип игълан ителде. «Укытучы - төп һөнәрләрнең берсе. Үсеп килүче буынга нәрсә салуыбызга илебезнең, республикабызның һәм тулаем дөньяның ничек үсеш алуы бәйле», - дип белдерде ул.
Гомумән алганда, Татарстанда 36,6 мең мәгариф системасы хезмәткәре исәпләнә, шул исәптән 32 меңнән артык укытучы. «Мәгариф һәм фән министрлыгына һәм муниципаль берәмлекләр башлыкларына укытучыларны һөнәри бәйрәмнәре уңаеннан хөрмәтләүне оештырырга кирәк», - диде Рөстәм Миңнеханов.
Россия президенты Владимир Путин элегрәк шулай ук «өлкән яшьтәге кешеләр турында кайгырту - төп өстенлекләрнең берсе» дип белдерде. «Социаль гарантияләрне һичшиксез үтәүне тәэмин итәргә кирәк <…>, - дип ассызыклады ул.
