Татарстанда шәхси торак төзелешендә еллык план 6 процентка арттырып үтәлгән. Тапшырылган объектларның гомуми мәйданы 1,6 млн кв. метрдан артык тәшкил итә. Бу мәгълүматларны Республика Хөкүмәт Йортында узган киңәшмәдә Татарстан Төзелеш министрлыгы башлыгы Марат Айзатуллин җиткерде. Чараны Татарстан Республикасы Рәисе Рөстәм Миңнеханов үткәрде.
Айзатуллин мәгълүматларына караганда, республикада барлыгы 2,884 млн кв.метр торак тапшырылган, ул планлаштырылган мәйданның 93 процентын тәшкил итә. Коммерцияле торак буенча 142 күпфатирлы йорт файдалануга тапшырылган — план 80,5 процентка үтәлгән.
Министр торак төзелешенә ярдәм ике федераль программа буенча башкарылуын искә төшерде: 26 объект төзелә торган «Торак» проекты һәм «Авыл территорияләрен комплекслы үстерү» проекты — аның ярдәмендә 7 мәйданчык компактлы торак төзелеше өчен җиһазландырыла. Беренче программа хәзерге вакытта 53 процентка тәмамланган, ә икенчесе буенча Саба районында бер объект калган, аның әзерлеге 88 процент тәшкил итә.
Моннан тыш, Татарстан Төзелеш министрлыгы башлыгы инфраструктура, социаль, мәдәни һәм башка объектларны төзү һәм ремонтлау программаларын гамәлгә ашыру һәм милли проект кысаларында башкарылган эшләр турында сөйләде.
