Казанда 2нче троллейбусларда йөрү өчен кондукторсыз түләү системасының эш тәҗрибәсе билетсыз йөрүчеләр саны кими баруын күрсәтте. «Метроэлектротранс» предприятиесендә «куяннар» белән хәлне шулай шәрехләделәр.
«Әгәр башта пассажирларның яртысына якыны юл йөрү өчен түләмәскә мөмкин булса, хәзер бу бердәнбер очраклар», - дип аңлаттылар предприятиедә.
Киләсе атнадан кондукторсыз система тагын өч маршрутта (6, 13нче троллейбусларда һәм 4нче трамвайда) эшли башлау сәбәпле, предприятиенең Контроль-ревизия бүлеге хезмәте эше көчәйтеләчәк, аның төп максаты штраф түләтү генә түгел, ә юл хакын түләү культурасын булдыру.
