«Татарстан – Яңа гасыр» телеканалы Татарстан Рәисе Рөстәм Миңнехановның республика Дәүләт Советына еллык юлламасын трансляцияли. Чара 14 сентябрьдә уза. Трансляция Мәскәү вакыты белән 9:55 сәгатькә планлаштырылган.
Татарстан лидерының мөрәҗәгате ТР Дәүләт Советы депутатларының 46нчы утырышы кысаларында уза. Анда Дәүләт Думасы депутатлары, сенаторлар, Татарстан хөкүмәте әгъзалары, шулай ук республика муниципаль районнары, министрлыклар һәм ведомстволар башлыклары чакырылган.
Искәртик, Рөстәм Миңнехановның Татарстан Дәүләт Советына беренче мөрәҗәгате 2010 елның 13 октябрендә булды. Шуннан бирле чара ел саен үткәрелә. Анда узган елгы эшкә йомгаклар ясала, барлык дәрәҗәдәге хакимият эшенә планнар куела, шулай ук республика үсеше өчен төп юнәлешләр билгеләнә.