Татарстан Республикасы Рәисе Рөстәм Миңнеханов югослав һәм серб кинорежиссеры, кино актеры Эмир Кустурица һәм «Ленфильм» киностудиясе Директорлар советы рәисе, продюсер, режиссер һәм актер Федор Бондарчук белән очрашты. Очрашу ТР Хөкүмәте Йортында узды. Бу турыда Татарстан җитәкчесенең матбугат хезмәте хәбәр итте.
Эмир Кустурица һәм Федор Бондарчук бу көннәрдә Татарстан башкаласында уза торган XIX Казан халыкара мөселман киносы фестивале кунаклары булды.
Рөстәм Миңнеханов очрашуда катнашучыларга Казан кинофестиваленә игътибар өчен рәхмәт белдерде. Ул билгеләп үткәнчә, әлеге фестиваль Казанның туристлар җәлеп итүчәнлеген, бөтен дөньяда танылуын үстерүгә ярдәм итә.
