Татарстан Республикасы Рәисе Рөстәм Миңнеханов Дүшәнбе шәһәрендә Таҗикстан Президенты Эмомали Рахмон белән очрашты. Яклар товар әйләнешен арттыру һәм Россия - Таҗикстан мөнәсәбәтләре кысаларында хезмәттәшлек турында фикер алыштылар, дип хәбәр итә ТР җитәкчесе матбугат хезмәте.
Рөстәм Миңнеханов Татарстан белән Таҗикстан арасында товар әйләнеше артуын, әмма күп түгеллеген әйтте - 2022 ел мәгълүматлары буенча ул 30 млн доллардан арткан. «Аны күп тапкыр арттыру өстендә эшләячәкбез. Сезнең республика белән Россия Федерациясе арасындагы икътисади элемтәләрне ныгыту өчен без Татарстанның әйдәп баручы компанияләренең Таҗикстан базарында булуын киңәйтү белән кызыксынабыз», — дип белдерде Татарстан Рәисе.
Республика компанияләре Таҗикстанга вертолетлар, нефть химиясе продукциясе, нефть-газ җиһазлары, хәләл продукция һәм башка товарлар җибәрергә әзер, дип дәвам итте ул.
Моннан тыш, Рөстәм Миңнеханов әңгәмәдәшенә татар җәмәгатьчелегенә ярдәм иткәне өчен рәхмәт белдерде. Аның мәгълүматлары буенча, хәзер Таҗикстанда 12,5 меңнән артык татар яши.
Эмомали Рахмон, үз чиратында, Татарстан Рәисе сәфәренең мөһимлеген билгеләп үтте. Бу Россия һәм Таҗикстан арасындагы мөнәсәбәтләрне ныгытуга ярдәм итәчәк.
