Казан дәүләт медицина университетының медицина сыйныфлары булган Казанның өч мәктәбе 2023 ел өчен RAEX агентлыгы рейтингының «медицина» юнәлеше буенча Россиянең иң яхшы 25 гомуми белем бирү учреждениесе арасына керде.
Советлар Союзы Герое А.С.Умеркин исемендәге 116нчы лицей рейтингта – алтынчы, 179нчы гимназия – 19нчы, 139нчы гимназия 25нче урынны били, дип хәбәр иттеләр Казан дәүләт медицина университетының матбугат хезмәтендә.
RAEX рейтингына Россиянең медицина профилендәге 50 гомуми белем бирү учреждениесе кергән. RAEX мәктәп тәмамлаучыларның югары уку йортларына керүенә инде тугызынчы тапкыр анализ ясый. Мәктәпләрнең позициясен билгеләү өчен бюджет нигезендә, максатчан кабул итү нәтиҗәләре, түләүле нигездә һәм олимпиадада җиңү нигезендә гомуми конкурс буенча укырга кергән мәктәп тәмамлаучылар турында мәгълүматлар исәпкә алынган.
Казан дәүләт медицина университетында билгеләп үтүләренчә, 2022-2023 уку елында ун гомуми белем бирү оешмасында (Казандагы – дүрт, Чаллы, Әлмәт, Яшел Үзән, Кукмара һәм Биектау бистәсендәге берәр мәктәптә, шулай ук Калмыкия Республикасы башкаласы – Элиста шәһәрендәге мәктәптә) медицина университетының 23 медицина сыйныфы эшли. Казан дәүләт медицина университетының медицина сыйныфларында барлыгы 528 бала белем ала. Яңа уку елында университетның медицина сыйныфлары булган мәктәпләр исемлеген Казандагы «Адымнар» күп телле белем бирү комплексы һәм Мөслим гимназиясе тулыландырачак.
