«Татарстан Республикасында туризм һәм кунакчыллык өлкәсен үстерү» дәүләт программасын финанслауны арттырачаклар. Әлеге максатларга элегрәк планлаштырылганга караганда 1 миллиард сумга күбрәк акча бүлеп биреләчәк, диелә республика Премьер-министры Алексей Песошин имзалаган карарда.
Программага барлыгы 8 миллиард 27 миллион сум бүлеп биреләчәк, шуның 1 миллиард 707 миллион сумы – республика бюджетыннан.
Акчалар 2025 елга кадәр этаплап бүленәчәк. Әйтик, быел җирле бюджеттан – 219,4 миллион, федераль бюджеттан 493,2 миллион сум бүлеп бирү күздә тотыла. Моннан тыш, муниципаль бюджет һәм бюджеттан тыш чыганаклардан да акча җәлеп ителәчәк.
Билгеләп үтелгәнчә, әлеге финанслау күләмнәре – фаразлау характерында.
Искәртеп узабыз, элегрәк программа тарафыннан туризм өлкәсенә 7 миллиард сумнан артык акча бүлеп бирергә ниятләгәннәр иде.
Узган ел туризм өлкәсенә федераль проект ярдәмендә 530 миллион сум юнәлдерелде. Әлеге акчаларга Тәтеш районында Түбәтәй-Tower күзәтү манарасы өчен инфраструктура булдырылды, ә 16 эшкуарга үзләренең туристик проектларын үстерү һәм җиһазлар сатып алу өчен грантлар тапшырылды.