Казанда Тукай урамындагы 84 нче йорт - сәүдәгәр Апанаевның ХІХ гасырда салынган ике катлы йорты яңадан сатуга куелды. Милек хуҗасы бина өчен 105 млн сум алырга планлаштыра, тиешле белдерү популяр ресурста пәйда булды.
Йорт Казанның тарихи үзәгендә, Иске Татар бистәсенең үзәк өлешендә урнашкан. Бинаның мәйданы 782 квадрат метр. Йорт фасады Мәдәният министрлыгы таләпләренә туры китереп торгызылган.
«Объектны торгызу буенча килештерү сорала торган барлык эшләр дә тәмамланды. Бина эчке бизәлеш эшләрен башкаруга һәм алга таба эксплуатациягә әзерләнгән», – дип искәртелә белдерүдә.
Бу йортны 2020 елда сатуга куйганнар иде инде, ул вакытта аның өчен 95 млн сум сораганнар. Сату буенча яңа игълан бу атнада чыкты.
XIX гасырның 80 елларында архитектор Романов проекты буенча төзелгән йорт 2012 елда шәхси инвесторга сатылганнан соң реставрацияләнгән. Бина республика әһәмиятендәге мәдәни мирас объекты булып тора.
