Киләсе көннәрдә Татарстанда һава торышы кабат үзгәрәчәк. 2 августта термометр баганалары яңадан 30 градустан югары күтәреләчәк, дип хәбәр итә Татарстанның Гидрометеорология үзәге.
Бүген, 1 августта, урыны белән кыска вакытлы яңгыр яварга мөмкин. Термометр баганалары көндез +22..+27 градус күрсәтәчәк.
2 һәм 3 августта һава торышында зур үзгәрешләр булмаячак - кыска вакытлы яңгыр фаразлана, төнлә һава температурасы +12..+17 градус тәшкил итәчәк. Әмма көндез эссерәк була: 2 августта +24..+29 градус һәм 3 августта +26..+31 градус эсселек көтелә.
Алдан әзерләнгән фаразда күренгәнчә, 4 һәм 5 августта республикада кыска вакытлы яңгырлы һәм эссе һава торышы көтелә. Көндез эсселек +27..+32 градуска кадәр җитәчәк.
Россиянең Гидрометеорология үзәгендә сөйләүләренчә, август бөтен Идел буе федераль округы территориясендә аномаль җылы булачак.
