Татарстан Рәисе Рөстәм Миңнеханов бүген республика Сәламәтлек саклау министрлыгының яңартылган бинасында булды. Ул бүлмәләрне карады һәм ведомство эшенең ничек оештырылуы белән танышты. Бу хакта Татарстан җитәкчесенең матбугат хезмәте хәбәр итә.
Фото: © ТР Рәисе матбугат хезмәте
Татарстан сәламәтлек саклау министрлыгы башлыгы Марсель Миңнуллин бина буенча экскурсия уздырды. Алар гомуми бүлекне, беренче катта балаларга медицина ярдәме күрсәтүне оештыру бүлеген һәм йөкле хатын-кызларга ярдәм хезмәтен, гражданнарны кабул итү, хезмәт хакы буенча исәп-хисап бүлекләрен, медицина эшчәнлеге сыйфаты стандартларын контрольдә тоту идарәсен карады.
Шулай ук Рөстәм Миңнеханов министрлык тарихына багышланган экспозициядә булды һәм хезмәткәрләр белән аралашты.
Искәртик, Татарстан Сәламәтлек саклау министрлыгы Бутлеров урамындагы 40/11 нче йортка күченде. Аның Островский урамындагы элеккеге бинасында Татарстанның «Беренчеләр хәрәкәте» штабы урнашты.