Казан табиблары шартлауда зыян күргән ир-атны коткаруда ярдәм итү өчен вертолетта Түбән Камага килде. Бу хакта «Татар-информ»га үз чыганагыннан билгеле булды.
Татарстанның Республика клиник хастаханәсеннән ике белгеч Түбән Камага Үзәк район күп профильле хастаханәсенә килде.
Табиблар каты пешкән яшь ир-атка ярдәм итәчәк. Пациент үз аңында һәм авыр хәлдә.
Искәртик, бүген иртән Вахитов проспектында торак йортта газ шартлаган һәм көчле янгын башланган. Анда ике кеше имгәнгән, берсе хастаханәдә.