Миңнеханов «Алабуга» махсус икътисади зонасының яңа куәтләрен бәяләде
Татарстан ел саен республика предприятиеләре өчен 10 мең квалификацияле кадр әзерләү бурычын куя. Республика Рәисе Рөстәм Миңнеханов бүген Алабуга районында «Алабуга» махсус икътисади зонасында булды, шулай ук аның Күзәтчелек советы утырышын уздырды. Бу хакта республика җитәкчесенең матбугат хезмәте хәбәр итә.
Татарстан Республикасы Рәисе үз сәфәрен «Алабуга Политех»ның биш яңа лаборатория-остаханәсен караудан башлады. Алар арасында су белән тәэмин итү һәм канализация цехы, контроль-үлчәү приборлары участогы, түбән вольтлы электр челтәрләре участогы, мәгълүмат-техник системалар белән идарә итү бүлеге, ремонт-механика цехы остаханәләре бар.
Искәртик, «Алабуга Политех» Россиядә квалификацияле эшче кадрлар әзерләү буенча иң зур белем бирү үзәге булып тора.
Миңнеханов «Алабуга Политех» студентлары белән әңгәмә корды, укытуның беренче курсында ук аларның югары квалификациясен билгеләп үтте, шулай ук медицина үзәге, торак зоналары, спорт мәйданчыгы урнашкан кампуста булды.
Бигрәк тә республика җитәкчесе медицина үзәген бәяләде, анда «Алабуга Политех» «Дәвалау эше һәм медицина техникасы» юнәлеше буенча белгечләр әзерли. «Монда заманча җиһазлар. Квалификацияле кадрлар әзерләү өчен барлык шартлар да тудырылган», - диде Татарстан Рәисе.
«Без үзебез өчен ел саен 10 мең белгеч әзерләү бурычын билгеләдек. Кайбер мәсьәләләр республика дәрәҗәсендә дә, федераль дәрәҗәдә дә чишелешләр таләп итә», - дип билгеләп үтте Татарстан Республикасы Рәисе, «Алабуга» махсус икътисади зонасы Директорлар советы рәисе Рөстәм Миңнеханов.
Бүген «Алабуга»да 11 мең эш урыны булдырылган. 2032 елда персонал саны 24700 кешегә җитәргә мөмкин, дип белдерде махсус икътисади зонаның генераль директоры Тимур Шаһивәлиев.
Миңнеханов «Алабуга» зонасы өчен кадрларга ихтыяҗ буенча тәкъдим ителгән планны хуплады.