Югары Ослан картлар һәм инвалидлар интернат-йортында «Кулинар мәктәбе» мастер-классы узды. Бу хакта «Югары Ослан» газетасы яза.
Бу юлы дәрестә шарлотка әзерләделәр. Интернатта яшәүчеләр бу десертны алма һәм кура җиләге белән пешерергә тәкъдим итте. Җимешләр барысы да интернат бакчасында үсә, интернатта эшләүче хезмәткәрләр җитәкчелегендә анда яшәүчеләр даими рәвештә үсентеләрне карап, тәрбияләп тора.
«Кулинар мәктәбе» түгәрәгендә катнашучыларның барысы да әлеге пирогны әзерләү рецепты белән таныш булып чыккан.. Кемдер камыр, икенчеләр алмадан, кура җиләгеннән эчлек әзерләгән.
Традиция буенча мастер-класста катнашучылар хуш исле камыр ризыкларын татып карады. Хезмәт буенча инструктор Наталья Котова сүзләренә караганда, «Кулинар мәктәбе» дәресләре яшәүчеләр арасында зур популярлык казанган. Аларга үз куллары белән төрле ризыклар әзерләү ошый, алар «барысы да килеп чыга», – дип шатлана. Мондый чаралар аларның үзбәяләрен арттыра һәм коллективта эшләргә өйрәтә. Шуңа күрә интернатта кулинар мастер-класслар даими эшләп тора, диелә хәбәрдә.
