Бүген, 14 июльдә, 16.00 сәгатьтә Татарстан Милли музееның конференцияләр залында ТР Югары Советы тарафыннан республиканың Дәүләт гимны кабул ителү һәм композитор, гимнның көй авторы Рөстәм Яхинга багышланган кичә узачак. Бу хакта Татарстан Милли музее матбугат хезмәте хәбәр итә.
ТР Дәүләт гимнының көе Татарстан Республикасы Югары Советының 1993 елның 14 июлендәге карары белән расланган. Көй авторы – күренекле татар композиторы Рөстәм Яхин. Алга таба Татарстан гимнына әверелгән көйне ул узган гасырның 70нче елларында татар шагыйре Рамазан Байтимеров шигыренә иҗат иткән.
«Туган ягым» җыры үз вакытында шактый популяр булган. Әмма 1993 елда Рамазан Байтимеров сүзләре гимн сыйфатында расланмый һәм аның яңартылган вариантын булдыру, шулай ук рус теленә тәрҗемә итү өчен тагын 20 ел кирәк була. Шул рәвешле, быел Рөстәм Яхин көенә Дәүләт гимны раслануның 30 еллыгы билгеләп үтелә.
СССРның халык артисты, композитор Рөстәм Яхин 1993 елның 23 ноябрендә вафат була. ТР Милли музеендагы кичә гимнның кабул ителүенә генә түгел, ә бөек композитор истәлегенә дә багышланачак. Музей кунаклары Рөстәм Яхинның әсәрләрен ишетә, аның тормышын чагылдырган видеоматериаллар белән таныша һәм Татарстан гимнының җентекле тарихын белә алачак.
https://tatmuseum.ru/
