Татарстан, грамоталы җитәкчелек ярдәмендә, хәтта ил өчен иң авыр булган 90нчы елларда да, җитештерүне саклап калды гына түгел, ә арттырды да. Республика предприятиеләр белән идарә итүдә дәүләт катнашуын саклап калуга ориентлашты, дип билгеләп үтте Татарстан Республикасы Рәисе Рөстәм Миңнеханов ОТР телеканалына биргән интервьюсында.
Рөстәм Миңнеханов Татарстан Республикасының беренче Президенты Минтимер Шәймиев ролен ассызыклады, ул куйган төп бурыч – тотрыклылыкны һәм сәнәгать потенциалын саклап калу. «Приватизация чорында да ниндидер үзенчәлек бар иде – кемгәдер таратып бетерергә түгел, ә дәүләт катнашын саклап калырга. Һәм бу үз нәтиҗәләрен бирде. Мин ул вакытта зур җитәкче түгел идем, ләкин бу зур җитәкчеләрнең эшен дәвам итүче булдым. Һәм бу юл бик дөрес булып чыкты, без беренче президентыбызга бик рәхмәтле», – диде ул.
Татарстан үз икътисадын үзгәртеп корырга өлгерде, чимал куәтләреннән тыш эшкәртү куәтләре дә барлыкка килде, дип өстәде ул. Бу эш нәтиҗәсендә былтыр сәнәгать продукциясе күләме буенча республика 5 триллион сумга якынлашты.
«Бу безнең хыялыбыз иде. Узган ел, быел без әлегә үсеш белән барабыз. Төп капиталга инвестицияләр дә, сәнәгать җитештерү күләме дә, авыл һәм төзелеш күләме буенча да. Барлык күрсәткечләр дә әлегә уңай динамика белән», – дип нәтиҗә ясады Татарстан Рәисе.
Исегезгә төшерәбез, бүген «Россиянең иҗтимагый телевидениесе» (ОТР) телеканалында Татарстанга багышланган махсус чыгарылыш күрсәтелде. Көн дәвамында тамашачыларга республиканың һәм аның башкаласының икътисады, сәнәгате һәм мәдәнияте турында сөйләделәр.
