Татарстанда белем бирү оешмаларын, шулай ук аларның берләшмәләрен төбәк инновацион мәйданчыклары дип тану тәртибен расладылар. Бу боерыкны республика премьер-министры Алексей Песошин имзалаган.
Оешмаларга инновацион мәйданчык статусы гариза буенча, Татарстан Мәгариф һәм фән министрлыгы каршында оешкан экспертлар советы карары нигезендә бирелә, диелгән документта. Татарстан үсешенең төп юнәлешләрен һәм дәүләт сәясәтенең өстенлекле юнәлешләрен исәпкә алып, мәгариф системасын модернизацияләүне тәэмин итү өчен мөһим әһәмияткә ия булган инновацион проектларны яки программаларны гамәлгә ашыручы оешмалар инновацион мәйданчык дип танылачак.
Мондый мәйданчыклар эшчәнлегенең төп юнәлешләре арасында мәгариф эчтәлегенең яңа элементларын һәм тәрбия системаларын, яңа педагогик технологияләрне, уку-методик һәм уку-лаборатория комплексларын кертү , эшләү һәм апробацияләү бар. Шулай ук мондый мәйданчыкларда һөнәри белем бирү өлкәсендә яңа әзерлек профильләре эшләнә ала.
Инновацион мәйданчыклар эшчәнлеге белән идарә итү өчен Татарстан Мәгариф өлкәсендә инновацион инфраструктураны үстерү мәсьәләләре буенча махсус төзелгән Координация совет җавап бирәчәк. Анда ТР Мәгариф министрлыгы, РФ Мәгариф министрлыгы вәкилләре, җирле үзидарә органнары, фәнни һәм иҗтимагый оешмалар хезмәткәрләре керәчәк.
Мәгариф оешмасын инновацион мәйданчык дип тануга гаризалар 1 сентябрьгә кадәр кабул ителә. Бу эш белән Татарстан Мәгариф һәм фән министрлыгы кураторлык итәчәк.
