Казанның Ершов урамындагы яңа сәүдә-күңел ачу үзәге төзелә. Аның бер дивары өчен микрорайон төзелеше вакытында сүтелгән Арча казармаларының борынгы кирпечен кулланачаклар.
«Татарстан 24» телеканалы хәбәр иткәнчә, бу стена мемориал дип аталачак. Куллану алдыннан борынгы кирпеч чистартыла һәм тарихи материалның ныклыгы һәм эстетикасы сакланырлык итеп эшкәртелә.
Сәүдә үзәгендә училище музеен ачу планлаштырыла. Бу хакта «Выстрел» Казан югары артиллерия команда училищесы ветераннары һәм чыгарылыш укучыларының иҗтимагый оешмасы рәисе Валерий Голованов хәбәр итә.
«Төзүчеләр белән шартлы килешү бар. Алар анда Балалар иҗат йорты өчен бүлмәләр бүлеп бирә», — дип сөйләде Голованов.
Училищега керү юлындагы тарихи пушкаларның язмышы әлегә билгеле түгел. Телеканал хәбәр иткәнчә, алар Россия Саклану министрлыгына карый һәм хәзерге вакытта Казан танк училищесында саклана, күрсәтмә уку әсбабы булып тора.