Казанда өч мәйданчыкта узган Сабан туена 170 меңнән артык кеше килгән. Быел татар халкының милли йолалары, аш-суы, биюләренә һәм мастер-классларга аерым басым ясалган. Казан шәһәре Башкарма комитетының Мәдәният идарәсе башлыгы Азат Абзалов «Татар-информ» агентлыгында узган матбугат конференциясендә шулай дип белдерде.
«Казанда узган Сабан туена 170 меңнән артык кеше килде. Бәйрәм көнендә кунаклар 20 меңгә якын өчпочмак, 10 меңнән артык пәрәмәч һәм өлеш ашады, 3 мең литрдан артык чәй эчте. Программаны 2,5 меңнән артык артист әзерләде», - дип белдерде ул.
ТР мәдәният министры урынбасары Дамир Натфуллин билгеләп үткәнчә, оештыручылар алдында бәйрәмне традицион формаларда үткәрү бурычы торган. Моның өчен, аерым алганда, милли уеннар һәм мастер-класслар оештыру өчен утарлар саны арттырылган. Шул ук вакытта, бәйрәм популярлыгын да саклап калырга тиеш.
«Сабан туендагы безнең максатларның берсе – бәйрәмнең элек-электән килгән традицияләренә кире кайту һәм моны мөмкин кадәр күп кешегә җиткерү. Без бу юлны башладык кына, әле барысы да алда. Шулай да без дөрес юлдан барабыз дип ышанам», - диде ул.
Киләсе Сабан туена да максат билгеләнде инде – 2024 елда бәйрәмгә яшьләрне мөмкин кадәр күбрәк җәлеп итәргә һәм моның өчен махсус милли мотивлар кулланырга тиешләр.
