Татарстан юллар сыйфаты буенча Россия төбәкләре рейтингында 19 урынны алган. Бу рейтингны 2022 ел йомгаклары буенча РИА Новости экспертлары төзегән.
Республикада төбәк, муниципаль һәм җирле әһәмияткә ия гомумкулланылыштагы автомобиль юлларының 64,4 проценты норматив таләпләргә туры килә.
Шул ук вакытта Татарстанда каты япма түшәлгән юлларның тыгызлыгы 1 мең квадрат километрга 471,4 километр тәшкил итә.
Рейтингта Чукотка автоном округы 18 урын (төбәк һәм җирле юлларның 65,4 проценты нормативка туры килә) һәм Красноярск крае 20 урын (63,2 процент) алып Татарстан белән янәшә урнашкан.
Рейтингның лидерлары – Мәскәү, анда төбәк һәм җирле юлларның 97,6 проценты норматив таләпләргә туры килә. Шулай ук Ханты-Манси автоном округы, Краснодар крае, Чиләбе өлкәсе һәм Ингушетия алдынгы урында.
«<…> иң яхшы сыйфатлы юллар икътисади яктан үсеш алган төбәкләрдә була, бу очракта исә Ингушетия искәрмә булды», – дип хәбәр итә белгечләр.
Иң начар юллар – Архангельск өлкәсендә, анда трассаларның 13,3 проценты гына нормативка туры килә. Киров өлкәсендә һәм Марий Элда хәлләр бераз яхшырак: Татарстанның күршеләре булган бу төбәкләрдә юлларның 25 һәм 27,7 проценты норматив таләпләргә туры килә.
