Казанда Борһан Шаһиди урамындагы «Кеше приюты» павильонын төзекләндерү эше бара. Ул Татарстанда эшли торган шундый тугыз павильонның беренчесе һәм төп ноктасы, дип хәбәр итә шәһәр мэриясе.
Мохтаҗларга ризык өләшенә торган калган сигезеннән аермалы буларак, төп павильонда торак корпуслар, кер юу бүлмәсе, мунча, кием тарату павильоны, чәчтарашханә, консультацияләр өчен бүлмә һәм башкалар бар, барлыгы 21 кечкенә вагон урнашкан. Шулай ук анда социаль патруль өчен машиналар тора, теплицалар, спорт мәйданчыгы, намаз бүлмәсе бар.
Хәзерге вакытта вагоннар яңартыла – монда торучылар өчен яшәү шартлары уңайлырак булачак, ә пунктның кешеләрне кабул итү мөмкинлеге артачак. Сүз уңаеннан, хәзер торак вагоннар 40 кешене сыйдыра.
Башкарма комитетта сөйләүләренчә, ике вагон тулысынча әзер, тагын икесе җиһазландыру этабында. Монда яшәүчеләр ремонтта үзләре дә катнаша: алар караватлар җыя, буйый – үзенә күрә хезмәт терапиясе.
Быел «Игелекле Казан» эгидасы астында гамәлгә ашырыла торган «Кеше приюты» проектына биш ел тула. Бу вакыт эчендә активистлар 1,4 миллион порциядән артык ризык тараткан һәм 47 меңнән артык тапкыр мохтаҗларга төн кунып чыгуны тәэмин иткән.
Проект җитәкчеләре Татарстанның барлык район үзәкләрендә дә ризык тарату пунктлары ачарга һәм көненә 10 мең порция ризык бирергә ниятли. Хәзер республика халкы тәүлегенә 2 меңгә якын порция ала, айга – 60 меңгә якын, бу санны кечкенә шәһәрчек халкын ашату белән чагыштырып була.
