Чаллының 63нче комплексында поликлиника ачарга җыеналар. Бу хакта «Шәһри Чаллы» хәбәр итә.
63/15 йортында яшәүчеләргә табиблар эзләп ерак йөрисе булмый. Ул йортның беренче катында урнашкан. Хәзерге вакытта биредә ремонт бара. Пациентлар кабул итү, кан алу, процедура бүлмәләре ясыйлар. Шәһәр моның өчен 443 кв.метр урын бүлеп бирде. Төзекләндерү эшләренә 19 млн сум сарыф ителә.
Ремонт августта тәмамлана. Яңа медицина учреждениесендә 4нче балалар шифаханәсе һәм 7нче шифаханә табиблары кабул итәчәк. «Быел шундый 5 участок ачарга ниятлибез. Шифаханәләр 63, 64, 65 комплекста яшәүчеләргә хезмәт итәчәк», - дип сөйләде 4нче балалар шифаханәсенең баш табибы Юрий Галиев.
Яңа хастаханә В.Поляков урамы, 20А йорты (63/15) адресы буенча урнашкан.
