ТР Рәисе матбугат хезмәте
Бүген Татарстан Рәисе Рөстәм Миңнеханов Төрекмәнстанның Халк Мәсләхәте рәисе Гурбангулы Бердымөхәммәдов белән телефон аша элемтәгә керде. Күтәрелгән мәсьәләләр арасында алар «Россия-Ислам дөньясы: KazanForum» форумы турында да фикер алышты.
Төрекмән халкының милли лидеры «KazanForum»ның традицион рәвештә иң югары дәрәҗәдә узачагына ышанычын белдерде. Рөстәм Миңнеханов, үз чиратында, Президент Владимир Путинның форумга федераль статус бирү карары турында искәртте – Татарстан Республикасы Рәисе фикеренчә, бу карар чарага дөнья җәмәгатьчелеге тарафыннан тагын да зуррак кызыксыну уятты.
Гурбангулы Бердымөхәммәдов форумга вәкиллекле делегация җибәрде, аның составына төрле тармаклар – сәнәгать, транспорт, төзелеш җитәкчеләре керде, дип хәбәр итә Татарстан Республикасы Рәисенең матбугат хезмәте.
Моннан тыш, форум мәйданчыгында Төркмәнстан стенды оештырылачак. Халк Мәсләхәте башлыгы, аерым рәвештә, Төньяк-Көньяк кебек яңа логистик коридорларның мөһимлегенә игътибар юнәлтте. Миңнеханов аның белән килеште, форум кысаларында бу темага түгәрәк өстәл утырышы узачагын өстәп узды.
Йомгаклау сүзендә Гурбангулы Бердымөхәммәдов Татарстан Республикасының беренче Президентына, республиканың Дәүләт Киңәшчесе Минтимер Шәймиевкә җылы сәламләү сүзләре җиткерүне сорады.
