Дәүләт Думасының Саклану комитеты җитәкчесе Андрей Картаполов «Россия 24» телеканалы эфирында хәрби бурычлыларга электрон повесткалар тапшыру тәртибен аңлатты.
«Повестка хәрби бурычлы кешенең шәхси кабинетына урнаштырылуга алынган дип санала», – диде ул.
Парламентарий аңлатканча, электрон повесткалар традицион хәбәр итү ысуллары – имзалау өчен кәгазь повесткалар тапшыру яки эш урыны аша бирелә торганнары белән бер вакытта җибәреләчәк. Моннан тыш, алар хәрбиләргә күп функцияле үзәкләрдә бирелә алачак.
Электрон повесткалар кертү хәрби бурычлыларның бердәм реестрын булдыру турында закон проектында каралган, аны бүген Дәүләт Думасының пленар утырышында караячаклар. Документ нигезендә, повестка алган кешеләр бу хакта ике атна эчендә хәрби комиссариатка шәхсән хәбәр итәргә тиеш булачак. Чакырылырга тиеш булган һәм повестка алмаган кешеләр хәрби исәп мәгълүматларын тикшерү өчен хәрби комиссариатка килергә тиеш була. Аларга шулай ук киләсе чакырылыш чоры башланганнан соң ике атна бирелә. Хәрби хезмәттән качып йөрүчеләр өчен җәза билгеләү күздә тотыла.
