Казанда республика муниципаль берәмлекләре арасында «Татарстанның мәдәни башкаласы» конкурсы старт алды. Мәдәният көннәре шәһәрнең 13 мәйданчыгында узачак. Лениногорск районы беренче булып бәйгедә катнашты.
Муниципалитет халкы казанлыларга зур мәдәни программа тәкъдим итте, кунакларны милли гореф-гадәтләр, халык кәсепләре белән таныштырды. Мисал өчен, аларны «ЭтноАзбука» күргәзмәсе көтә иде, анда йорт кирәк-яраклары, татар, мордва, чуваш һәм руслар халкының борынгы киемнәре, һәм башка тарихи көнкүреш әйберләре куелган иде.
Шулай ук күргәзмәдә район һәм аның халкы тарихына багышланган документлар һәм фотосурәтләр, шагыйрьләр һәм язучыларның китаплары, Советлар Союзы Геройлары, туган як кешеләре турындагы карточкалар тәкъдим ителде.
Күргәзмә программасыннан соң кунакларны концертка чакырдылар. Иҗат коллективларына жюри алдында чыгыш ясарга туры килде, анда республиканың атказанган сәнгать эшлеклеләре катнашты.
Искәртик, конкурста җиңү яулаган район федераль яисә төбәк мәдәни проектларының берсен гамәлгә ашыру урынына әвереләчәк. Моның өчен аңа 3 млн сум күләмендә грант бүлеп бирәләр.
