Татарстан Рәисе Рөстәм Миңнеханов республика Гаилә кодексына үзгәрешләр кертү турындагы законга имза куйды. Төзәтмәләр суррогат ана мәсьәләләрен җайга салуны көйли торган маддәләргә кагыла. Аерым алганда, баланың ата-анасы булып парлы гаилә генә түгел, ә суррогат ана турында килешү төзегән ялгыз хатын-кыз да языла алачак.
Гаилә кодексының Бала туу турындагы кенәгәгә яңа туган сабыйны теркәү турында 42 маддәсенә өстәмә кертелә. «Үзара никахта торучы затлар» дигән урыны «йөклелек чоры һәм тудыру (суррогат ана) турында килешү төзегән вакытта үзара никахта торучы затларның берсе яки икесе дә РФ гражданы яки Россия гражданлыгы булган ялгыз хатын» дип үзгәртелә.
Моннан тыш, башка хатын-кызга эмбрион имплантациясенә ризалык биргән ир белән хатын, шулай ук суррогат ана, бала тууны рәсмиләштерү кенәгәсендә ата-аналарны теркәгәннән соң, ана һәм ата булуны дәгъвалаганда, әлеге шартларга таянырга хокукы булмавы турындагы пункт тулыландырыла. «Ир белән хатын» атамасына «ялгыз хатын» дип тә өстәлә.
Шулай ук, үзара никахта торучылар һәм суррогат анага ризалык бирүчеләр баланы тудырган хатын-кызның ризалыгы белән генә ата-ана буларак язылырга мөмкин, дип аныклана. Бу бары тик суд никахның ялган һәм суррогат ана турындагы килешү өчен генә төзелмәгәнлеген ачыкламаган очракта гына мөмкин. Мондый никах нәтиҗәсендә хокуклары бозылган ир яисә хатынның баланың ата- анасы булып язылу хокукы таныла.
Искәртик, Миңнеханов Гаилә кодексына үзгәрешләрне соңгы тапкыр 3 февральдә кертте. Алар уллыкка алынган һәм тәрбиягә алынган балаларны мәктәпкә кабул итүгә кагыла иде.
