Төркиядә җир тетрәүләрдән зыян, көтелгәнчә, 100 миллиард доллардан артып китәчәк. Бу хакта «Российская газета» Берләшкән милләтләр оешмасының үсеш программасы вәкиле Луиза Винтон сүзләренә сылтама белән хәбрә итә.
Ул Берләшкән милләтләр оешмасының киләсе атнада узачак донор конференциясе алдыннан комментарий бирде. «Төркия хөкүмәте тарафыннан тәкъдим ителгән һәм халыкара партнерлар хуплаган исәп-хисап буенча зыян күләме 100 миллиард доллардан артык тәшкил итәчәк», - дип белдерде Төркиянең Газиантеп шәһәреннән видеоэлемтә буенча Берләшкән милләтләр оешмасының үсеш программасы Луиза Винтон.
6 февральдә Төркиядә һәм Сириядә җир тетрәүләр нәтиҗәсендә 52 меңнән артык кеше һәлак булган. Винтон сүзләренчә, Төркиягә генә караган зыянның якынча саны 16 мартта Брюссельдә узачак донорлар конференциясе өчен нигез булып тора, дип хәбәр итә Spiegel. Чара барышында җир тетрәүдән зыян күрүчеләр өчен акча тупланырга тиеш.
Элегрәк Бөтендөнья банкы Төркиягә китерелгән зыянны якынча 34,2 миллиард долларга бәяләде. Винтон Төркиянең иң зыян күргән Хатай провинциясендәге вакыйгаларны «апокалиптик» дип атады, йөзләрчә мең йорт җимерелде, дип белдерде. «Ихтыяҗ зур, әмма ресурслар аз», - дип йомгаклады Берләшкән милләтләр берлеге вәкиле үз сүзләрен.
