«Без биредә үз телебездән оялабыз, Санкт-Петербургта татар теле «аксый», - диде татар активисты.
Шагыйрь, прозаик, «Мгинские мосты» әдәби берләшмәсен гамәлгә куючы Салават Шәмсетдинов фикеренчә, Санкт-Петербургта яшәүче иҗат әһелләре берләшә алмый.
«Шагыйрь, язучылар арасында шундый сыйфат бар – һәркем юрганны үзенә тарта. Берләшергә кирәк, ләкин берничек тә берләшеп булмый. Без биредә үз телебездән оялабыз, Санкт-Петербургта татар теле «аксый». Үзем дә сөйләм телен генә аңлыйм, сөйләшә алмыйм. Шуңа күрә мондагы татарларга рус телендә язылган татар китаплары кирәк», - диде ул Татар милли-мәдәни автономиясендә Татарстан журналистлары белән очрашуда.
Аның әйтүенчә, татар әдәбиятын, менталитетын рус телендә популярлаштырырга кирәк. «Мәктәптә герой-шагыйрь Муса Җәлил шигырьләрен укыдык. Әмма китапханәдән аның китапларын таба алмыйбыз. Җәлил генә түгел, Габдулла Тукай һ.б. китапларын да рус телендә укыр идек. Халыкның укыйсы килә, чөнки татар әдипләрен укып, исемнәрен ишетеп калучылар бар», - диде Салават Шәмсетдинов.
