Татарстан Дәүләт Советы Рәисе, Татарстанның Волейбол федерациясе президенты Фәрит Мөхәммәтшин республиканың хатын-кызлар ветераннар командасы әгъзаларын – 50 яшьтән өлкәнрәк спортчылар командалары арасында волейбол буенча Россия чемпионатында җиңүчеләре белән котлады.
Парламент башлыгы волейболчыларга Россия Кубогының финал уеннарында уңышлар теләде. Бу турыда Татарстан Дәүләт Советының матбугат хезмәте хәбәр итте.
Ветераннар командалары арасында волейбол буенча бөтенроссия ярышлары Анапа шәһәренең Витязево бистәсендә (Краснодар крае) 24 сентябрьдән 2 октябрьгә кадәр узды. Татарстан ветераннарының җыелма командасы 50 яшьтән өлкәнрәк хатын-кызлар командалары арасында волейбол буенча Россия чемпионы булды.
Безнең волейболчылар ышанычлы, җайга салынган уен күрсәтте һәм иң көчле көндәшләрен узып китте. Турнир алтыны өчен Россиянең барлык төбәкләреннән 160тан артык команда көч сынашты.
«Мондый чемпионнар ярдәмендә Татарстанның абруе булдырыла һәм тиешле дәрәҗәдә саклана», – дип белдерде Фәрит Мөхәммәтшин, чемпионнарга мөрәҗәгать итеп.
Республиканың волейбол хәрәкәте актив рәвештә үсә, дип билгеләп үтте ул. «Волейбол массакүләм спорт төренә әверелде, аны сәнәгать предприятиеләре хезмәткәрләре һәм муниципалитетлар вәкилләре уйный, без Мәктәп волейбол лигасын – мәктәп укучылары арасында иң зур турнирны уздыру инициаторлары булдык, – диде Фәрит Мөхәммәтшин. – Болар барысы да милләтебезне савыктыру өчен эшли. Спортчылар уйнаганда гына түгел, ә сезнең кебек җиңү яулаучылар булганда аеруча рәхәт. Сезнең мисалда республикабызда волейболны алга таба да үстерәчәкбез».
Парламент башлыгы үзе дә бу зыялы һәм күмәк уенның күптәнге җанатары булуын белдерде. Фәрит Мөхәммәтшин студентлар волейболын активлаштырырга, югары һәм урта уку йортлары студентларын, укытучылар составын волейбол хәрәкәтенә җәлеп итәргә чакырды.
Россия чемпионаты җиңүчеләре автографлары куелган алтын тупны Фәрит Мөхәммәтшинга бүләк итте.
Очрашу ахырында Татарстан Дәүләт Советы Рәисе чемпионнарга ТР Волейбол федерациясе Президентының Рәхмәт хатларын тапшырды.
