Россия мөселманнарының Диния нәзарәте рәисе Мөфти Шәех Равил Гайнетдин Ислам мәдәнияте, фән һәм мәгарифкә ярдәм фонды директоры урынбасары, Мәскәү ислам институтының Ислам тикшеренүләре үзәге директоры, тарих фәннәре кандидаты Дамир Хәйретдиновны Россия мөселманнарының югары дәрәҗәдәге бүләге - «Хезмәтләре өчен» ордены белән бүләкләде. Бу хакта Мөфтиләр шурасының матбугат хезмәте хәбәр итә.
«Ислам мәгарифен, фәнен һәм мәдәниятен үстерү өчен күпьеллык хезмәте, Ислам һәм Россия мөселман җәмгыятьләре тарихын өйрәнүгә шәхси өлеше һәм 50 яшьлеге уңаеннан бүләкләнә», диелгән РФ мөселманнары Диния нәзарәте рәисе имзалаган указда.
Бүләкләү Мәскәү ислам институтының яңартылган бинасын ачу тантанасында узды. Дамир Хәйретдинов 2017 елга кадәр Мәскәү ислам институты ректоры булган.
