«Интертат» сайты һәм «Татар-информ» мәгълүмат агентлыгының татар редакциясе баш мөхәррире журналистларны чит илләргә җибәрү кирәк, дип саный.
«Интертат» сайты һәм «Татар-информ» мәгълүмат агентлыгының татар редакциясе баш мөхәррире фикеренчә, журналистларга дөньяда кайнау, киң караш җитми.
Бу хакта ул ТР Журналистлар берлегендә «Интернетта татар матбугаты: беренче татар электрон газетасы «Интертат»ка 20 ел» түгәрәк өстәл утырышында әйтте.
«Үз эчебездә генә кайнап ятмас өчен һәм журналистиканың абруен күтәрү өчен, журналистларны чит илләргә җибәрәсе иде. Бу хакта Әсгать Әхмәтович (Сәфәров – Т.И. искәрмәсе) белән очрашуда да әйттем. Һичьюгы, Үзбәкстан, Казахстан.... бәлки, Башкортстан», - ди Рәмис Латыйпов.
«Элек бит журналист, әдип, язучыларның биографияләрен карасак, төрле чит илләрдә эшләгәннәр. Ә хәзер журфакны бетереп килгән журналистларның дөньяны күзаллавы да икенче. Баш мөхәррирләр генә түгел, журналистларны җибәрергә кирәк», - диде «Интертат» баш мөхәррире.
Татарстан Журналистлар берлеге рәисе, «Яңа гасыр» телерадикомпаниясе генераль директоры Илшат Әминов та фикерне куәтләп: «Казахлар көчле эшли, милли журналистиканы күтәрләр. Барырга кирәк», - диде.
